Monataj arkivoj: Septembro 2022

Teksto de la monato (Septembron 2022-an)

Hajkoj

Lag’ forlasita,
kaj muta. Plaŭd’, ensaltis
rano subita.

Baŝoo

 

Kia malpravo !
Florvidi oni iras
kun longa glavo !

Kjorai

 

Ĉu florfolio
post fal’ revenis branĉen ?
Ne ! – papilio.

Moritake

 

Ĉu l’ aŭtunvento
dutagan Lunon blovis
de l’ firmamento ?

Kakei

 

Serĉas por nutro
la pego, inter floroj,
arbon kun putro.

Jooŝoo

 

Flava makulo
en ĵus falinta neĝo.
Ho – la aĉulo !

Kikaku

 

El la Tutmonda sonoro, tradukis Kálmán Kalocsay